ราชา’ห เถรํ ‘‘ญาโต โว,

ทาสภาโว อิทานิ โน;

สามเณรํ เปสเยถ,

ตุมฺเห เม สตฺตวสฺสิกํฯ

[55]

ชนกฺขยํ วินาเยว, กลโห น ภเวยฺย โน;

ราชา สงฺฆสฺส โทเสโส, ภํเฆ ทณฺฑํ กริสฺสติฯ

[56]

เหสฺสตา’คตกิจฺจา โว,

ยาคาทิํ คณฺหาถาติ โส;

ทตฺวา ตํ ภิกฺขุสงฺฆสฺส,

ปกฺโกสิตฺวาน ภาตรํฯ

[57]

ตตฺเถว สงฺฆมชฺฌมฺหิ, นิสินฺโน ภาตรา สห;

ภุญฺชิตฺวา เอกโตเยว, ภิกฺขุ สงฺฆํ วิสชฺชยิฯ

[58]

สสฺสกมฺมานิ กาเรตุํ, ติสฺสํ ตตฺเถว ปาหิณิ;

สยมฺปิ เภริํ จาเรตฺวา, สสฺสกมฺมานิ การยิฯ

[59]

อิติ เวรมเนกวิกปฺปจิตํ,

สมยนฺติ พหุํ อปิ สปฺปุริสํ;

อิติ จินฺติย โกหิ นโร มติมา,

น ภเวยฺย ปเรสุ สุสนฺต มโนติฯ

สุชนปฺปสาทสํเวคตฺถาย กเต มหาวํเส

ทฺเวภาติกยุทฺธํ นาม

จตุวีสติโม ปริจฺเฉโทฯ

ปญฺจวีสติม ปริจฺเฉท

ทุฏฺฐคามณิ วิชโย

[1]

ทุฏฺฐคามณิราชา’ถ , กตฺวาน ชนสงฺคหํ;

กุนฺเต ธาตุํ นิธาเปตฺวา, สโยคฺคพลวาหโนฯ

[2]

คนฺตฺวา ติสฺสมหารามํ, วนฺทิตฺวา สงฺฆมพฺรวิ;

‘‘ปารคงฺคํ คมิสฺสามิ, โชเตตุํ สาสนํ อหํฯ

[3]

สกฺกาตุํ ภิกฺขโว เทถ, อมฺเหหิ สหคามิโน;

มงฺคลญฺเจว รกฺขา จ, ภิกฺขูนํ ทสฺสนํ หิโนฯ

[4]

อทาสิ ทณฺฑกมฺมตฺถํ, สงฺโฆ ปญฺจสตํ ยตี;

ภิกฺขุสงฺฆตมาทาย, ตโต นิกฺขมฺม ภูปติฯ

[5]

โสธาเปตฺวาน มลเย, อิธาคมนมญฺชสํ;

กณฺฑุลํ หตฺถิมารุยฺห, โยเธหิ ปริวาริโตฯ

[6]

มหตา พลกาเยน, ยุทฺธาย อภินิกฺขมิ;

มหาคาเมน สมฺพทฺธา, เสนาคา’คุตฺตหาลกํฯ

[7]

มหิยงฺคณมาคมฺม, ฉตฺตํ ทมิฬมคฺคหี;

ฆาเตตฺวา ทมิเฬ ตตฺถ, อาคนฺตฺวา อมฺพติตฺถกํฯ

[8]

คงฺคา ปริขาสมฺปนฺนํ, ติตฺถมฺพทมิฬํ ปน;

ยุชฺฌํ จตูหิ มา เสหิ, กตหตฺถํ มหพฺพลํฯ

[9]

มาตรํ ทสฺสยิตฺวาน, เตน เลเสน อคฺคหิ;

ตโตโอรุยฺห ทมิเฬ, สตฺตราเช มหพฺพเลฯ

[10]

เอกาเหเนว คณฺหิตฺวา, เขมํ กตฺวา มหพฺพโล;

พลสฺสา’ทา ธนํ เตน, เขมาราโมติ วุจฺจติฯ

[11]

มหาโกฏฺฐนฺตเร โสพฺเภ, โทโณ ควรมคฺคหี;

หาลโกเล อิสฺสริยํ, นาฬิโสพฺภมฺหิ นาฬิกํฯ

[12]

ทีฆาภยคลฺลกมฺหิ, คณฺหิ ทีฆาภยมฺปิ จ;

กจฺฉิปิฏฺเฐ กปิสีสํ, จตุมาเสน อคฺคหิฯ

[13]